Кузебай Герд Стихи для детей на удмуртском языке
СӤЗЬЫЛ
Туннэ лыктӥз сӥзьыл,
сӥзьыл туннэ лыктӥз…
Тӥни ук: бадяр йыл,
Горд вир кадь, гордэктӥз.
Куаръёс ӵужктӥзы,
ӵуж тыл кадь, ӝуало.
Ӝуа палэзьузы…
Гужем ортчиз оло?
Инмын тури куара.
Лобӟо луд-ӟазегъёс.
Быриз луд уж, аран.
Ӧвӧл лудын ӟегъёс.
Кырӟа, черсэ гурт ныл.
Гурзэ пересь эстӥз…
Туннэ лыктӥз сӥзьыл,
сӥзьыл туннэ лыктӥз…
Сӥзьыл куазь
Куазед дугдытэк
Зоре но зоре…
Гуртэз, урамез
Коттэ но коттэ.
Укно борды зор
жуге дугдытэк.
Тӧлэн йыгаське
укно борӟетэд.
Вылын – лыз пилем,
улын – сьӧд дэри…
Силь-зор дугдытэк
кисьтэ но кисьтэ…
Дуриськись
Дуриськись!
Дуриськись!
Пот татчы кебитысь:
валэлэн дуретэз
нош усем сюресэ,
нош ик дур аль сое!
— Вай дуром, мусое!
Тани – ӵог,
кык дага,
тани – пась…
Ток!
Ток!
Ток!
Я, Пока,
валэд дась!
Ужлэн крезьбурез
Заводын станокъёс
дыбырто: тук! ток! то!
Кебитын молотъёс
йыггето: ток! тук! то!
Паравоз гурт сьӧртӥ
кесяське: у-ту-тӥ-и-и!
Выль трактор бусӥын
ургетэ: урр! дурр! дзыннн!
— Кинлэн со кырӟанэз? –
пи юа аизлэсь…
— Тод, пие: со – ужлэн,
выль эрказ калыклэн
кырӟанэз, крезьбурез.
Источник:
Герд К. Люкам сочинениос: в 6 т.: Т.6 /Кузебай Герд.- Ижевск: Удмуртия, 2005
