Ашальчи Оки Стихи для детей на удмуртском языке
ЧИЯПУЭД СЯСЬКАЯСЬКЕ…
Чияпуэд сяськаяське…
Чигошур ву чиль-чиль бызе…
Сьӧд дуринчи сяська сюпсе,
Чияпуэд сяськаяське…
Чебер нылмурт туж яратэ,
Чебер пилы туж синмаське –
Тӧдьы бамыз ӵыж ӵыжектэ…
Чияпуэд сяськаяське…
КИН-О ТОН!..
Кин-о тон?
Дӥсянэд дарали,
Тон ачид кенӟали –
Кенӟали кадь ачид чупали.
Йырсиед бабылес,
Тон ачид бубыли –
Бубыли кадь ачид тон капчи.
Синъёсыд кизили,
Мон тыныд синмаськи –
Кизили синъёсад мон выи…
Кин-о тон?
Оло, тон шурали?..
Ӝытазе шур улэ
Тодматскын монэным лык али!
***
Ку меда адӟиськом
Ми нош ик соин табере:
Ӵуказе-а, туннэ ӝыт-а?
Мар-о меда вереськом?
Толон со мон вылысь
Ӧжыт но синзэ ӧз басьты.
Огкыл веран турттэ вал но,
Веран мыным ӧз дӥсьты.
Ини ӵукна дырысь,
Книга кутса, мон пукисько,
Ог кылзэ но уг валаськы,
Оло, визьтэм-а луисько?..
САЛАМ
Юмшан пӧлысь эше бертӥз,
Мыным отысь ивор ваиз:
— Гажан мурттэ адӟи, — шуиз, —
Тыныд салам веран косӥз.
— Марк е кадь, дыр, со саламез,-
Шуи солэн пумитаз…
Аслам бамы ӵыжектӥз,
Шумпотэмме возьматӥз.
ТЕАТРЫН
— Учкы али, учкы али,
Эшъёсмы но лыктӥллям!
— Кудӥз соос, уг адӟиськы,
Кытчы соос пуксиллям?
— Тӥни отын, асьме сьӧрын,
Оло синмыд гӧртэм, лэся!
— Ӧйтӧд, ӧйтӧд, уг тодӥськы,
Оло гӧртэм, оло ӧвӧл…
Гортэм ке нош, малы меда
Одӥг удмурт пиез адӟе?!
Источник:
Ашальчи Оки Тон юад мынэсьтым: кылбуръёс, веросъёс, гожтэтъёс / Ашальчи Оки.- Ижевск: Удмуртия, 1978
